وانا من زمنا خدو مشلخ وهي من ازمانا خدها سادة
اتعجبت سماحة مواتر طبقات عالية وكلها سادة
وكانت بينا فوارق شاسعة اتعارفنا وكانت جادة
قالت:- (عيد ميلادي الشر الجاي ولازم تحضروا )
قتلا خير ودخل في ضافري بتقصد ايه بي عيد ميلادا
ايا ربي اتولدت يادابا يبقي الاعياد سوها زيادة
يمكن ولدت وانا ما عارف ويمكن ميلاد عيسي واجداده
ايا ربي بدقو الدلوكا وبعزمو الحلال كالعادة
بس قتلا خير وانا جايييكم وعديلا وزين
الشهر الجاي مرق مركوبي من السحارة
داقاهو المطرة قبل شهرين
ونكت طاقيتي من العضاضة سليتلي سماد رقعتها زين
سديريتي وابوي مسويها لبد فرتقت اللبدة مرقتها طين
عراقي مغزوز في الكوكار كان سوهو وقاية وقت فازعين
سروال مدفوس في رحل العيش ملفوف محشور بين شوالين
لميتن واديتن شطفة وشريتن فوق لي زريبة الزين
والزين بقراتو مكوفرات تب مضغن طاقيتي هرنها زين
شافتن السرة بت الهراف طردتن وجابتن لقداف
وغضبت غضب وعزمت اقوم جفن ما جفن اقوم في الحين
مرقت ووشئ مطوطو تب وصتني الحلة رجال وعوين
وصتني ام نوفل لي كركار كان تلقي ودك جيب لي رطلين
وقروشا حلف صرة وبي خيط ووصتني حليمة بت العجمين
سروال لمحمد ورطلين بن بنبيعلنا شاه ونديك بعدين
وصاني وليدا لي جابر جيب لي سفروق بسرح بي غنمك يومين
والناس بتوصي وغبيانا والناس غبيانا وبتوصي
وانا ظرفي مكدر وزي الطين
بتوصي انا زي بائعلي بعير وانا بائع تيسي وعيش كيلتين
والتيس اعور ما جابلا سعر والعيش بتاب ومسوس وشين
تسود خطوة ها السفرة انا ماشي لي واجبا واقوم بالدين
وركبت الباص مخلاتي دفس كدوسي وحقة وعودسكين
وانا راكب في الباص بتأمل يا ربي بجيبو الحكامات
بتسو دلوكة بجو الحلال ويا ربي بعزمو الرقاصات
ضابحين تيران ام خرفان صر وبدققوا كمين شوالات
وانا مالي ومال عيد ميلاد ان نزلو الدلوكة ولادم
انا بنزل حدي ومتعقب وادرق اصقر في الدارات
وامسك سوطي المدهون قطران واركز واندق
شأن السمحات ما يقولن ضيفنا قريدن ساكت
وانا زول معروف خراب حفلات
ووصل وسأل لامن جيت وهداك الحوش يرقش لوحات
ولقيت الحوش مزرود لا حدو بنات سمحات
شايلات هدايات وحدات وردات وحدات زهرات
شايلات رسمات في شكل ارنوب وحدات كدوس
وحدات اسود ونمور سبحان الله زي الميتات
وانا جيت بي ايدي ما عارف شئ شايلي الفين
داير اكتبن في الدفتر جت وانا زول واجبات
والناس ملخومة ومربوشة يضاحكو قر
حايشين صينية تزق شمعات
مافي زولا قال لي انت منو ما بعرفو الضيف زي الخواجات
وانا كت راجي الدلوكا تدق لكن اللوم بجي بالهفوات
دليت عكازي وقفت طرف وملص نعلاتي اتفرشخت
ولي تفة خلالي مصنقرو تب سكيني ملسني بالجمبات
تمباكي وحقتي مزرودة ولعت كدوسي واخدت جبدات
وانا بتامل هذا العالم ياتو البنوت وياتو الجنيات
والاروع في هذي الظيطة ما عرف اصلا زولتي الجيتا
بحرت عيني لامن برقن كل البنوت زيها سمحات
والبقر اتشابه لي ضمه ما عرفت الفاتن والجايات
لي حسن الحظ هي النقرتني ما شالت شك من شافتني
ساقتني وقامت بي الواجب هي اصيلة وطيبة وست حوبات
نادت صاحباتا بنتعارف ناندي ونانسي وعفراء ولمياء وكفي
من وين من لندن جينا امس وراجعين باكر زي ها اللحظات
من الطائف والمنشية ومدينة النيل وبلود راقيات
طيبات طيبة وكل كليمة معاها ضحيكة ونضاف ورهاف زي اللعبات
واحدة فيهن سمحة سماح لكن ما طاعمة وانا زول مستغرب في حاجات
انا زول اسراني سماحة قاسية بت البلد الثابتة وراسية
سماحة تاية الماهو ملفق وماهو مزيف بي كريمات
وهسه هن نهشن يتسألن عرف نفسك بي عبارات
ات ياتك من يات كوكب من يات سادة واستايلك زاتو خرب للعادة
قلت ليهن انا الاسد الحرس غابتو الضرية
وانا الساعة القتال بخطف حدية
وانا الدارك عدوي طابقلو كية
وانا الزائرني ما بيجيب لي هدية
وساكن مفسح ام هبج السخية
مراتع البل الضان السعية
مهنتي مجالس ابدرك الجدية
وادرك عرضة الرقدت سدية
————–
اسم القصيدة :- عيد ميلاد
للشاعر :- بشرى البطانة
Hello, Neat post. There is a problem along with your web site in internet explorer, would check this? IE still is the market leader and a large part of other people will miss your wonderful writing due to this problem.